02‏/04‏/2007

حظر النشاط لا مؤاخذة الديني


سعادة فخامة الرئيس الأبدي مبارك طبّخ شوية قاذورات دستورية لتحجيم الإخوان وترسيخ حكمه . . انا شخصياً ما عنديش مانع بس حقيقي انا مش فاهم حاجة واحدة . . هو متخيل انه ناوي يحكم كمان كام سنه؟!! سنة؟ اتنين؟ خمسة؟!! مش مهم بس في الآخر هايرحل واللي هايستفيد من التعديلات دي اللي بعده - واللي بعده ده في علم الغيب لحد دلوقتي رغم كل التخطيط اللي بيخططوه - وده نفس السيناريو اللي السادات عمله لما فتح مدة الرئاسة لمالا نهاية واللي استفاد منها مبارك بس للأسف ما حدش بيتعلم من اخطاء الماضي

المهم ان النظام المصري كوميدي جداً وقرر انه مش بس يحظر الأحزاب على اساس ديني ده كمان حرم الأنشطة السياسية على اساس او مرجعية دينية وعلشان يُقر التعديلات استخدم اكبر واسوء رمزين دينيين في مصرشيخ الأزهر والبابا بس طبعاً الناس دي لما تستخدم في تمرير التعديلات ده ما يبقاش نشاط ديني بس طلاب الجامعة لو طلعوا في مظاهرة للتنديد بحفريات المسجد الأقصى ده هايكون نشاط سياسي له خلفية دينية وهايبقوا خارجين على الشرعية والدستورية


النقطة اللي فاتت على فخامته هو وشوية الصيّع اللي مرروا التعديلات دي ان اي حد ربنا يكرمه ويقدر يركب على كرسي الحكم مش ممكن ينزل . . دستورياً وقانونياً ما ينفعش ينزل يعني اليسار لو ركب وما عدلش الدستور هايفضل يحكم الى ما لا نهاية والليبراليين نفس الشيء والإخوان المسلمين اللي هما مربط الفرس لو ركبوا من حقهم ما ينزلوش ومن حقهم يتصنتوا على مكالمات لصوص الحزب الوطني وهايكون من حقهم انهم يحبسوا خونة الحزب الوطني وبعد ما يحبسوهم يبقوا يكتشفوا انهم كانوا ابرياء وساعتها هايحتاجو انهم يفكروا يطلعوهم او لأ . . بس ساعتها ما حدش يزعل لأن اللي حضّر العفريت يصرفه

مبروك لمبارك تعديلاته والزمن مالوش كبيييير

هناك 4 تعليقات:

محمود سعيد يقول...

مش هاعلق علشان محدش يقول لى بانط فى كل التعليقات

:-)

الكواكبي يقول...

هاهاهاها
لالا اتفضل نط

همسة قلم - أسماء يقول...

:)أنط أنا

بصراحة هو لو كان فاكر انه الزمن ليه وعليه ماكنش قعد لغاية دلوقتي ولو كان ليه مرجعية اصلا ماكنش عدل الدستور ولا حبس الاخوان ولا عمل اللى بيعمله
دول فاكرين انهم آلهة مؤلهة نازلة من السما مالهاش كبير ومالهاش نهاية
وعجبتني اوي الجملة اللى انت بتقول فيها

ما حدش يزعل لأن اللي حضّر العفريت يصرفه

فيارب العفريت ده يركبه الاخوان علشان نشوف مين فينا هايقول انصرف انصرف

ودستور ياسيادهم

entrümpelung wien يقول...

شكرا على الموضوع
entrümpelung
entrümpelung
entrümpelung wien