٠٩‏/٠٩‏/٢٠٠٧

السلطة المطلقة مفسدة مطلقة



السلطة المطلقة مفسدة مطلقة

يعتصرني الألم وأنا أكتب هذه التدوينة
فلم أتخيل يوماً أني سأكتب لوماً لحماس وأنا الذي كنت أراهم النموذج والقدوة وأرى فيهم الكفاح والنضال؛ لم اتخيل اني سأكتب عن حماس معترضاً على رفضهم استغلال فتح للمشاعر الدينية واستخدامها صلوات الجمعة كي تعلن معارضتها لحكومة حماس في الشوارع والساحات
ما العيب في ان تعارض فتح؟ الم تعارض حماس بالأمس القريب. كلنا يعلم ما قامت به فتح من فظائع بحق حماس وغيرها من الفصائل ولكن رجل الشارع الفلسطيني كان ينعتهم بكلاب فتح وبالصهاينة العرب . . هل يرغب اخوتنا الحمساوية أن تنصب لعنات وشتائم بسطاء الشارع عليهم كأسلافهم من فتح
ما المانع في ان تستغل فتح منابر الجمعة في الساحات والشوارع؟! اليست تلك المنابر والساحات هي التي كفلت لنا التواصل مع الناس والشارع ونقلت الينا نبضهم وهي نفس الوسائل التي كنا نحارب كي لا نحرم منها
لماذا كانت حلال لنا والآن صارت محرمة عليهم؟ حتى إذا كان فسدة فتح وعملاء الأجهزة الأمنية كانوا يمنعون نشطاء حماس من منابر المساجد ومن باحاتها أليست حماس خيراً منهم؟ الستم يا حماس النموذج والقدوة؟ الستم النموذج الإسلامي للحكم في فلسطين
ان ما تقوم به حماس الآن من سياسة أمور القطاع عبر قوتها التنفيذية ما هو الا صورة "اسلامية" لحكم القمع؛ لا فرق الآن بين حكم فتح او حماس او مبارك والقذافي فكلها أشكال حكم ركائزها الأمن والقوة والقمع لا الحب والسماحة والرضا بحكم الناس
ويبدو أن الظرف التاريخي الذي تمر به حماس الآن من وجودها في القطاع كقوة وحيدة لن تستخدمه كظرف نادر الوجود كي تبرهن على عدالة وانصاف الطرح الإسلامي بقدر ما ستستخدمه لتبرهن للجميع صحة مقولة أن
السلطة المطلقة مفسدة مطلقة




هناك ٩ تعليقات:

محمود سعيد يقول...

للأسف حماس فى غزة وفتح فى الضفة بيلعبوا مع بعض لعبة مين يقول أى الأول

والشعب فى النص بينهم هو اللى بيقول أى

إن وافقنا حماس جدلاً (جدلاً بس) على منع الصلوات فى الميادين وبيقولوا لك مسجد الضرار ، فمش ممكن أوفق أبداً على المناظر اللى شوفتها للقوة التنفيذية بتضرب المتجمعين بالعصى بوحشية وعنف

أصل للأسف الحكم الرشيد فى رأيى لازمه حاجتين : السلطة ورقابة السلطة
واللى موجود فى غزة قوة تنفيذية بلا رقابة ولا محاسبة ، تبقى مفسدة مطلقة زى ما قلت

وفى مشكلة تانية بقى أن شباب حماس ، والشعب كله بصفة عامة ، محتاجة ثقافة وفكر غير البقايا التكفيرية والعربية الطبيعية الغبية لأنهم حالياً لما بدأوا يطبقوا على أرض الواقع بقوا بيغلطوا كتير
ولسه بقى لما يتعلموا من أخطائهم الصبيانية

يا حماس قولى أى وإنتى الكسبانة

غير معرف يقول...

في اعتقادي ...
فصل ما يتم في غزة من أحداث عن ما يحاك في رام الله من مخططات ...يعد قصور في وجهة النظر وعدم إلمام بالقصة بجميع تفاصلها...
وفي جميع الحالات ..حماس بتواجه ضغوطات رهيبة مع تغيب لكتير من الحقائق بحكم حالة الحصار إلي بيتعرض ليها الاسلاميين في كل مكان..ولعدم امتلاكهم لأدوات فاعلة يقدروا يعبروا من خلالها عن رؤاهم ووجهة نظرهم...
يعني مثلاً موضوع صلاة الجمعة إلي فتح بتلعب بيه حالياً..
العالم بتوع فتح أساساً ولاد أحابي ووالوساخة مغرقاهم من ساسهم لراسهم وأغلبهم مش بتوع لا صلاة ولا صوم..
والي تم في غزة من منع لصلاة الشارع إلي دعت ليها فتح ...تم أكتر منه بمراحل فترة حكم فتح لغزة...وتم تضخيمه إعلامياً بصورة مستفزة...
يا اسلام ...ده أمن الدولة بتاع فتح كان بيسلم أعضاء حماس للإسرائيلين...

ولامؤخزة جاي حضرتك وبرائة الاطفال في عينك وتقولي السلطة مش عارف إيه ..تعمل مش عارف مين....
وفي الآخر ..هي إشكالية عويصة والسيناريو ده مرشح إنه يتكرر في مصر ...لإن الخصم معندوش نبل المقصد زائد الواقع مفهوش قواعد لعملية الصراع بين الفصائل السياسية..زي تركيا مثلاً إلي عندهم دستور نقدر نقول عليه محترم وقواعد تتحكم في عملية التنافس بين الاحزاب ...وحاجات كتير مش هنشوفها ولو بعد 100 سنة...
ومن الآخر دخول حماس أو الاخوان لتنافس على السلطة من خلال إنتخابات حالياً مش في صالح الاخوان أو الاسلاميين عموماً ...لإن آلية إدارة التنافس أساساً مش موجودة..يعني مفيش قاعدة بتحكم الاشياء....
فبالتالي...الحل الوحيد هو المطالبة الاول بعمل الآلية المناسبة لإدارة عملية التنافس ...يعني إصلاح الوضوع...وبعد كده تبتدي نتنافس على أرضية محترمة...والمطالب السابقة مينفعش الاخوان يطلبوها لوحدهم...لازم الناس كلها تطلبها....
* حاجة مهم جداً..وهي التغطية الإعلامية لأحداث غزة...وبحكم إن أغلبية وسائل الاعلام العربية "بوق" دعائي رخيص..فبالتالي بتوصلنا الصورة مشوهة وقاتمة على عكس الواقع إلي ممكن يكون على صورة مغايرة لما يتم نشره...
وقناة العربية وموقعها الالكتروني نموذج على كده...الرسالة الاعلامية إلي بتقدمها القناة والموقع ذات اجندة خبيثة ...يعني هما نشروا خبر عن زواج لبنانيات جنوبيات من جنود اليونيفيل ...الخبر يعد من أخبار المنوعات ....إنما الرسالة إلي في تفاصيل الخبر خطيرة وعلى درجة عالية من الخبث...وراجع الخبر في قسم الصفحة الاخيرة على الموقع..
فرجاء يا عم إسلام يا كواكبي ..متنجرش لشئ ..المفروض إنك عندك من الأدوات إلي متخلكش تنجر ليه...
وبصراحة "الشفافية" الزيادة عن اللزوم إلي راكبه إلي بيدوروا في فلك الحل الاسلامي ...أحيان كتير بيكون ضررها أكتر من نفعها...في حاجات تتفوت ...وحاجات نعكس فيها الحقايق ونقلبها ونلعبها ونشخلعها...

من الآخر ...إحنا محتاجين ناس لامؤخزة في الكلمة "مرقعة" تدير أدواتنا الاعلامية "البسيطة" إلي إحنا بنستخدمها ..بدل ما إتحولت أغلبها لمنشورات ووسيلة لطرد الموهبين والمتميزين والضغط عليهم بقواعد تنظيمية ساذجة وتعطلهم عن الانطلاق في دنيا الله الواسعة...يعني الواحد من دول يكون مميز وموهوب ...يدخل ال..ولا بلاش !!!
بدل مجموعة الدراويش وشلة المطبلاتية والمشهلاتية إلي بيدروا الأدوات دي حالياً...إلي مفهمش واحد عِدل..
أحسن هنتاكل في سوق الاعلام وناخد لامؤخزة على قفانا !!!
-------------
كل إلي فات ده...لا يمنع إني بحبك يا عسل...وليك عندي معزة خاصة ...لله في لله !!

Anas Emad يقول...

اقرأ تدوينة المؤرخ الهامي
و انت تفهم اللي حصل و بدون زعل

و بكل بساطة

هو طلاب الشرطة تدريبهم نفس تدريب طلاب الحربية ؟.

ده لو قلنا ان افراد القسام اللي في القوة التنفيذية ... طلاب حربية او كأنهم افراد صاعقة ..

توجيه اللوم جيد .. حتي بعدك عن سياج التعصب لجهة معينة .. في أحكامك

حتي لو كانو ا اخطئوا هم مش بشر

يوجد المزيد من الاشياء التي لم نعرفها و لن نعرفها عما حدث ...

وليد يقول...

السلام عليكم اسلام في الحقيقة التدوينة في محلها الخطاب الإهلالمي الظاهر من قناة الأقصى الآن في ظني غير مناسب للمرحلة والممارسات التي تتم كل يوم جمعة من حماس غير مقبول أقول هذا وأنا الذي كنت أجيب بكل قوة عند بداية حدوث أزمة اخراج الفتحاويين أن حماس معها كل الحق وأنا على ثقة دون أي تحليلات بأن قرارها هو الصواب ثقة في رجال عاشوا الرباط والجهاد وهو مأكلهم ومشربهم .... أما الآن فبدأت فكرة الأخ كحمد القط تتاكد عندي لدرجة اليقين أن العمل بأدوات العملية السياسية الآن ليس وقته من الأصل وأن البيئة التي نعمل بها كفيلة بتشويه أي تجربة وتشابك وتعقد الاتجاهات على المستويات الأقليمة والمحلية والدولية كفيل بؤد أي فكرة اسلامية في طريقها الى الرشد والرشاااد ... تأهيل البيئة لاستقبال الفكرة أولى من طرح الفكرة الإسلاميةفي غوغائية من المحيطين
وليد السيد

الكواكبي يقول...

الإخوة الأفاضل المعلقين أولاً يا أنس أنا متفهم جداً اننا لازم نتلمس لحماس الأعذار باعتبارها كانت ويا رب تظل رمز النضال الحر والشريف وعليه هاغض الطرف عن بساطة المقارنة اللي انت بتعملها بين الشرطة والجيش بل بالعكس انا هابني عليها سؤال ويا ريت تجاوبه بينك وبين نفسك في خلوة وهدوء . . هل ذنب سكان قطاع غزة أن حماس ليس لديها أفراد مؤهلون للعمل كشرطة فلجأت لأفراد الكوماندوز؟ هل هي مشكلة الناس في الشارع الغزاوي أم مشكلة حماس؟ وعلى فرض أن القوة التنفيذية شرطة فهل يعني هذا ان يكون الحكم بوليسي؟ اننا نضع أشقائنا في غزة بين شقي الرحى . . اما حكم عسكري أو حكم بوليسي

حبيب قلبي محمد القط . . طبعاص بعد كم الشتايم والقباحة اللي انت باديء بيها في التعليق بتاعك وبعد كده التحليل الفظيع اللي انت كاتبه اللي كله تبرير وميكافيللية سياسية لا أملك الا اني اقولك
دي سياسة أمك يا مزيكا
اوعى تبعت تشتم؛ ولو مصمم ابعت لي الشتيمة على الإيميل :)

الكواكبي يقول...

طبعاً احقاقاً للحق انا محترم وجهة نظر محمد القط الخاصة بإن الاسلاميين لن يقدروا على اية منافسة شريفة في ظل غياب آلية محترمة وشريفة تدير لعبة الصراع السياسي
بس ده هايحطنا في اشكالية هل نرجع خطوات الى الوراء وننسحب من اللعبة السياسية أم نصر على تعاطي السياسة ولكن وفق مجموعة من المباديء الحاكمة لنا كإسلاميين

غير معرف يقول...

حبيبي إسلام...
بحكم المهنة...الدنيا مكشوفة ليه بجميع أطرافها وخيوطها...يعني مثلاً الصور المتداولة عن اعتداء القوة التنفيذية على بعض اتباع فتح في غزة...أخدت أكبر من حجمها بكتير في حين إن وكالات الانباء موصلهاش من الصور دي غير ثلاث أو أربع صور بس...
على فكرة أنا هنا عندي إشتراك في الوكالات كلها...
وكل إلي قلته إن فتح في فلسطين والعصابة إلي بتحكمنا في مصر جرائمهم أكتر بكتير من حالة تدافع بين القوة التنفيذية ومجموعة الأجراء بتوع فتح ...تم تضخمها بصورة مبالغ فيها وعن قصد...
في حين إن الشعب المصري الشقيق ومن قبله الشعب الفلسطيني الصديق ..لامؤخزة بيتخبوروا من النظام في البلدين ...ومحدش فتح أم بقه بكلمة ولا حتى مصمص شفه...
يا راجل ده العيل بتاع المنصورة دغدغوه مش عارف على إيه...وغيره كتير بيحصل في أمن الدولة...
وانت بقى جاي وعامل فيها عنتر...وسانن قلمك على مش عارف إيه ...حصل فين...
إوزن الموضوع يا اسلام...وبصله بشموله...علشان حكمك يطلع في الجوون...إشمعنا إحنا يهني إلي عندنا هبل المكاشفة والمصارحة على الملأ...وبنتطوع لكشف حالنا للخصوم..زي فورست جامب ..لما كشف لامؤخزة بنطلونه للرئيس الامريكي ...علشان يوريله تعويرة في مؤخرته ...بكل سزاجة وعبط !!
المهم....
المطلوب ...إصلاح الأول...وبعد كده مشاركة...
إنما حالياً...مش هينفع المشاركة في الظروف الزبالة إلي احنا عايشيين فيها حالياً....
والله هي دي السياسة يا عبلة....
هي دي قوانين السوق...وقواعد اللعبة..عايز ..أهلاً وسهلاً..مش عايز ..أقعد بقى في البيت وبلاش وجع القلب من البداية ..وبلاها اصلاح....
ومن الآخر...أي محاولة إصلاح الاخوان هيحاولوا يطبقوها لوحدهم ...هتحصل مجزرة ...
لازم كل الناس تشارك وتضحي...وفي ظل الوضع الحالي...والقواعد والآليات المطبقة حالياً...مفيش أي أمل في إن مثلاً تحصل إنتخابات ويفوز أي فصيل او حزب محترم "هييييييييييييه" ولو حصل..معتقدش إن الموضوع هيتغير كتير..ومثال على كده...قانون الطوارئ...هنفترض جدلاً إن النظام رفع قانون الطوارئ...فكرك الوضع هيتغير...وغلاوة ستي عديلة..ما في حاجة هتتغير ولو شبر مليميتر...لإن السستم خربان...والرموت كونترول في إيد واحد بس..وهو إلي بيتحكم ..يقلب وقت ما هو عايز..ويقفل وقت ما هو عايز...ويغمق الالوان أو يفتحها ...برضك وقت ما هو عايز..
نهيئ الوضع الأول ونخلق بيئة محترمة لتنافس جيد...إنما حالياً الوضع مينفعش فيه أي منافسة...لإن هيحصل زي ما حصل مع حماس ونستدرج لحلقة مفرغة من ال......إسمه إيه ده ؟!!!!!
معلش ...بالنسبة لموضوع "المباديء الحاكمة لنا كإسلاميين"...ضحكتني يا مان...الموضوع ده واسع قوي...والي عندك مبادئ ..عند غيرك حاجة تانية...يعني فيه متسع وبراح وبحبحه...وادوات تقدر تلعب بيها....
يعني سيدك النبي...متصلي عليه...مثلاً في تعامله مع الاسير ..ليه شؤون..يعني قتل الاسير ...وفدى الاسير...وعفى عن الاسير...فين بقى المبادئ دي ...فخلي موضوع المبادئ الحاكمة ده على جنب حبتين ...لحد ما ربنا يفرجها !!!!!
-------
معلش ...موضوع حماس منفد على أحداث مصر..لإن الوضع مشابه حبتين...
إيه ده...كفاية رغي يا أخي !!!!!

عمر أفندى و أبووه يقول...


اسلام

انا عجبنى رأيك جدا و عنوان المدونة جدا

و ان كنت صدرى رحب لكل الاراء الاخرى بس بصراحة عمره ما كان رحب لاراء الاستاذ قط ده سواء عندك اوعند اى حد تانى على مدونته....اعذرنى يا سيد محمد يا قط انا بقول رأييى بصراحة و لا اقصد تجريحك لانى معرفكشى و مفيش بينى و بينك امر شخصى يستدعى ذلك ...انا بتكلم عن اراءك و ده يحتمل ان حد تعجبه و حد متعجبوش موش بتكلم مع شخصك ...فشخصك له كامل الاحترام

بس اراءك و تعليقاتك ...غريبة او مختلفة معايا على طول الخط

المهم بعيدا عن القط ....انا حاسس ان الموضوع دلوقتى دخل فى مرحلة الابتلاء اللى يحتاج مننا دعاء كثير لهم و الباشا التانى فى رام الله هو غبر شوية و بيهبهب كتير بس فى ناس تانية بتخطط وراه و بدأت مخطاطتهم تؤتى ثمارها بنفس اسلحة حماس و هية التظاهر ولبس ثوب المضطهدين و المعذبون و المكبتون فى غزة و ماشى السلاح ده معاهم كويس لحد دلوقتى و ربنا يستر على حماس

خلونا نفكر فى رمضان و ندعيلهم باخلاص فيه

و بالمناسبة دى مفيش مانع اخويا اسلام اعمل اعلان خفيف خفيف عندك

اقرأوا معى هذا الخبر العاجل

عمر افندى يصوم فى رمضان

غير معرف يقول...

الاستاذ عمر أفندي وأبوه...
معلش سؤال ع الماشي..هو إنت عمر أفندي ولا أبوه ؟!...
نرجع لمرجوعنا...بالنسبة لإختلافك أو اتفاقك مع آرائي من عدمه...فأحب أقولك وأبشرك...إفرح يا عم...مش إنت لوحدك إلي مختلف مع آرائي ومش عاجباه...لإن أساساً محدش إتفق معايا عليها أو عجبته آرائي ..إلي أنا بحبها جداً ومقتنع بيها جداً...بس ده لا يمنع إن أنا نفسي ...أحيان كتير بختلف معايا ومبتعجبنيش آرائي..لإنها مش قرءان..ومغلفتهاش بهالة التقديس والمبادئ إلي كتير بيلفوا آرائهم بيها !!!
يبقى إنت مش هتختلف ..أو حتى غيرك !!!
ومعنديش مانع إنك تقول رأيك بكل صراحة وبأي طريقة فيما أقول.
بس بصراحة ...إنت مقلتش إيه إلي إختلفت معايا فيه ؟!!
وكلامك مرسل وغير مستند على كلمة واحدة من إلي أنا قلته..هو إختلاف لمجرد إن كلامي مش عاجبك وخلاص...
وطبعاً أنا عاذرك...لأسباب ..أحتفظ بيها لنفسي...
وبالنسبة لكلامك "المهم بعيدا عن القط "..فمتنساش تدعيلي معاهم.
المهم...كل سنة وانت طيب بمناسبة رمضان...
بس ..خلاص !!