01‏/01‏/2008

الريس بيرة




الريس بيرة


الريس بيرة ده ريس جامد جداً . . ودايماً اي واحد يسمع تصريحاته يحس ان ليه نظرة "مبعدية" للأمور وتحليلاته كلها تحس انها من الدقة والعمق بشكل لا يمكن الا انه يكون خارج من معامل تحاليل مسجد فجر الإسلام اللي في ميدان عبود


الريس بيرة من يومين بالظبط ضرب تُمن محلول الشجاعة وطلع صرح انه توصل لفرضية جدلية عويصة اللي هي ان الحج فريضة اسلامية والحجاج الفلسطينيين مسلمين ومصر طلعت اسلامية برضه وبالتالي ما ينفعش دولة اسلامية تمنع حجاج مسلمين من فريضة اسلامية!


لحد كده محلول الشجاعة كان مفعوله شغال ومنغشش في تلافيف نافوخ الريس بيرة بس للأسف يا اما الصنف كان مغشوش يا اما كانت الجرعة قليلة لأن الريس بيرة وصبيانه قرروا بعد اقل من 12 ساعة انهم يسيبوا الحجاج في المراكب لحد ما يمضوا اقرار انهم ما يدخلوش غزة الا بعد ما يمضوا ورق على نفسهم انهم يسلموا نفسهم لليهود في معبر كرم سالم وبكده يبقى الريس بيرة باعتباره من منطقة اسلامية ما منعش الحجاج المسلمين من الفريضة الإسلامية بس قرر انه يسلمهم لليهود على اعتبار ان الحجاج لازم يدفعوا تمن الخطيئة اللي عملوها بأنهم حجوا . . وانهم وثقوا في الأشكال الوسخة اللي من عينة الريس بيرة وصبيانه وانهم صدقوا ان ديل الكلب ممكن يتعدل


انا عايزاعرف ايه رد فعل الريس بيرة لما عرف ان واحدة من الحجيج توفاها الله نتيجة المرمطة اللي شافتها بقى لها حوالي 10 ايام . . ليه ما حدش فكر الريس بيرة ان البضاعة ما ينفعش تتخزن في المالح من غير اكياس؟ البضاعة ممكن تتعب وييجي لها التهاب رئوي


للدرجة يا ريس بيرة بقيت موطي للي عايز يركب ويدلدل رجله! للدرجة دي بقين الردح اللي وزيرة خارجية الصهاينة ردحتهم لك هزوك وشقلبوا حالك؟! على حد علمي انها كانت في ابتدائي وبمريلة كحلي لما انت كنت النائب بيرة ولما ربنا فتحها عليك بالحظ والصُدف وبقيت الريس بيرة بجلالة قدره تيجي عيلة بكل المقاييس تبرجلك وتشل تفكيرك وتبوظلك بوصلتك دي بلدها عمرها 60 سنة وانت بلدك عمرها اكتر من 7000 سنة

والست عمرها 38 سنة يعني اصغر من عمر المحروس الصغير اللي عايز تسيبل له الجمل بما حمل


العيب مش عليك يا بيرة . . العيب على اللي رقاك وخلاك ريس

هناك 16 تعليقًا:

البرقي يقول...

مانت يا اسلام لو عارف نكتة طابا ماكنتش استغربت

بيقولك في المفاوضات خير الاسرائيليون الريس بيرة
اما ي...وه او يستولون على طابا
وطبعا شوهد الريس بيرة بعد ساعة تقريبا يعيد ترتيب ملابسه وهو يتمتم مستحيل اسيبهم ياخدوا طابا
وده ان دل فإنما يدل على وطنية الريس بيرة وتضحيته في سبيل مصر حتو لو كان بيضحي ب..........

عبدالمنعم محمود يقول...

يا اخي حرام عليك ده بيره جدع وكله شهامه
هو مش عايز يخلي ال1500 حاج دول يرجعوا غزة عشان ميجوعش اصل الريس بيره الست تسيبي منعته يبعت لهم أكل أو دقيق
فالراجل عمل واجب مع الناس الكباري دول اللي رجعين من بيت ربنا وقال يستضيفهم في خيم خمس نجوم في استاد العريش الرياضي
يعني الراجل قايم بالواجب واكتر
ومن هذا المكان أن احب اشكر الريس بيره علي موقفه الشجاع وتصريحاته الخطيرة تجاه الانسة تسيبي

بيراوي يقول...

إيه يا واد منك له قلة الأدب دي! هي البيرة عملت لكم حاجة! اشتم الريس براحتك بس اوعى تقرب ﻷهم الاختراعات المصرية. سامع؟

Nour-Gedeed يقول...

يااااه اتاري الدنيا صغيرة الواحد بيكتشف يوم ورا يوم انها مسيرها تنور اصل كل اللي بيحصل ده ما هو الا تضليم اكتر و اكتر و مسير البيرة تخلص ان شاء الله و ان مخلصتش الزمن هيخلص عليها بنفسه

عبد الجواد يقول...

الله يخرب عقلك يا اسلام تسكت تسكت ولما تنطق تشوط
واحده واحده الله يسترك
وايه كل داخل بياجر معاك
يلا هي شوطه ولا اكتر

ربنا يحببه في البيرة اكتر واكتر لغاية لما تصفى دمه

سارة يقول...

حسبنا الله ونعم الوكيل فى حكوتنا واللى بتعمله فينا . دى مصايبها مش للمصريين بس ، لأ كمان الفلسطينيين !!!!
طب هما مالهم ؟!!!!!!!

إحنا كشعب مصرى بندفع تمن انتمائنا لمصر ، بس إيه ذنب الحجاج يدفعوا التمن ده ليييييييييييه ؟

مش كفاية اللى بيشقوه من الاحتلال ؟

عشنا وشوفنا

وليد يقول...

عارف وانت راجع من الحج أ, من العمرة بيبقى إقبالك على وطنك غريب وكأن الله وضع فينا حب العودة كنوع من الفطرة لك ان تتخيل ان الوطن اللي هوه عندنا أم وراحة وسكينة واحتواء وإياب هوه ايه للناس دية ... اتخيل الناس دية وهيه على المراكب الأم مع ابنها على كتفها وهيه مش عارفه هتدخل امتى ولا هتدخل ولا لا .. مش عارف الريس لو سرح بخياله وفكر في رجل عجوز عنده سبعين سنة على عبارة ولا مركب متبهدل لا مأوى ولا أكل ولا علاج ولا بكرة شايفه هيبقى ايه حسبنا الله ونعم الوكيل دية ناس باعة أخرتها علشان تعيش دنيتها وتعيش اليهود دنيتهم
وليد

الكواكبي يقول...

يا نهار ابيض يا رجالة . . عمي وليد بيقترح ان الريس يتخيل راجل عنده سبعين سنة . . طب ما يتخيل نفسه احسن خصوصاً انه اللهم اني باقر يمكن يعيا ولا حاجة عنده 80 سنة
يعني الانجليز شرفوا في مصر 72 سنة وهو بقى له 80 سنة
الي انت بتقوله يا وليد انت والل يبيعلقوا ينفع يتقال لناس عندها مشاعر واحاسيس؛ الناس اللي من عينة الريس بتاعنا احاسيسها ماتت
شالت قلوبها وحطت مكانها جزم كاوتش

أمن دوله يقول...

على فكره
الكلام اللى انت كاتبه ده ممكن يخليك تشرف فى زيارة طويله شويه عندنا
و أهو برضه تونس اخوانك المسلمين

الكواكبي يقول...

ماشي يا عم أمن الدولة . . بس على فكرة تعددت الأسباب والموت واحد
بص يا عم الأمن: القفش في مصر كالموت يأتي بغتة؛ وما حدش بيعرف ساعة موته ولا ساعة قفشه لأنه لو عرف هايهرب
وبعدين لو أمن الدولة قرر انه يحبس كل اللي بيشتموا الريس مش هايلاقوا زنازين تكفي
لأن الناس طقت من جنابها وما بقتش مستحملة
وبعدين مين اني في امن الدولة هاقابل اخواني المسلمين؟َ انت ناوي تبلغ عني في امن الدولة ولا في النيابة العسكرية

عموماً ربنا يستر لما يمسكوني ما اعترفش عليك ان انت اللي حرضتني على كتابة البوست ده وقفشت منك ثلاثة جنيه الا ربع نقداً وعداً

أمن دولة يقول...

ايه يا عم انت صدقت ولا ايه
والناس مالها بطلت تعليقات ليه
ما فيش أمن دوله ولا نيله يا جماعة
أنا بهزر و الله
أنا واحد من اخوانكم يا جماعة و من الشرقية كمان و ما أدراكم ما الشرقية
وهم أمن الدوله لو عايزين حد هيهددوه على المدونه
لا ده على طول هيعملوله زيارة بدون انذار فى بيته على الفجريه كده

كمل يا اسلام و ربنا معاك
و ربنا يخرب بيت الريس بيره

CresceNet يقول...

Gostei muito desse post e seu blog é muito interessante, vou passar por aqui sempre =) Depois dá uma passada lá no meu site, que é sobre o CresceNet, espero que goste. O endereço dele é http://www.provedorcrescenet.com . Um abraço.

غير معرف يقول...

تدعوكم مدونة اطيار السنونو snono@maktoobblog.com ومدونة الطريق الى الفردوس doaa910@maktoobblog.com للاطلاع على حملة رفع الحصار عن غزة والتى تبدا فعالياتها فى 15 فبراير 2008...ندعوكم لزيارة المدونتين للاطلاع...ويمكن التنسيق للمشاركة عبر مدونة اطيار

meroo يقول...

تدوينه جامده اوى...اهنئك
حلوه الريس بيره دى بس اشمعنه بيره يعنى

entrümpelung wien يقول...

شكرا على الموضوع
entrümpelung
entrümpelung
entrümpelung wien

räumung يقول...

مدونة مميزة جدا
umzug
umzug wien
umzug wien