١٩‏/١٢‏/٢٠٠٦

فيلم (الطيب والوقح والشرير) . . كلاكيت عشرة آلاف مرة


الطيب

هو اسم رئيس جامعة الأزهر الحالي

كان يحمل سابقاً لقب مفتي الديار المصرية؛ وكان الناس ينادونه إما يا فضيلة الشيخ أو يا سماحة المفتي

تنازل في حركة تجردية نادرة عن مكانته الروحية السابقة وعن مكانته العلمية الحالية لبعض ضباط امن الدولة يوجهونه كيف شائوا . .

فانتقل من خانة عالم ومفتي سابق الى خانة مخبر للداخلية يقوم بالإبلاغ ضد الطلاب وتحركاتهم


الوقح

هو وصف لحواره التلفزيوني الذي اقل ما يوصف به انه فضيحة ولولا أنه "طيب" و"بركة" لما اشترك في تلك المهزلة . . فالقاصي والداني في مصر وخارجها يعرف كم التدخل الأمني الرهيب في شئون الجامعات المصرية؛ ورغم هذا التدخل فإن كل رؤساء وعمداء الجامعات والكليات المصرية دوماً يلوذون بالكذب كمُنجي من فضيحة التدخل الأمني؛ ودوماً ما يُسرون للأصدقاء أو لمن يثقون في اخلاقهم واماناتهم من الطلاب انهم مجبرون وان "ده نظام بلد" وكنا نلتمس لهم العذر فهم مقهورون مثلهم مثل اي طائفة او فئة في هذا البلد المنحوس في حكامه دوماً

أما أن يأتي "الطيب" ليقول بكل صراحة انه سعيد بإعتقال الطلاب . . وانه كان يتمنى أن يلقى القبض عليهم من بداية العام؛ وانه لن يتدخل للإفراج عنهم فإنه يكون قد انتقل بتلك التصريحات من خانة "الطيب " و"البركة" الى خانة الوقاحة


الشرير

هو الإعلام المصري الذي ترك كل مشكلات البلد من قطارات محترقة إلى عبّارات غارقة إلى التضخم مروراً بالمياه الملوثة والتعديلات الدستورية الرامية لحذف باب الحريات من الدستور المصري إلى رشاوى وفساد كبار المسئولين وهي المشاكلالت يتغاضى عنها الإعلام المصري لمدة تزيد عن الإسبوع ليجعل همه الأوحد قضية الطلاب

وعلى اي حال فإن من حق الإعلام ان يصنع الحدث لا أن يتابعه فقط ولكن بقليل من الرشد وبعيداً عن الإيذاء غير المبرر

فعلى سبيل المثال فإن السيدة منى الشاذلي هي وطاقم البرنامج خالفوا معايير الصدق والأمانة حين أذاعوا مشاهد من العرض الذي قدمه الطلاب في ذكرى استشهاد الشيخ احمد ياسين . . وفي الحلقة التي استضافت فيها الطالب صهيب شوكت الملط قالت بلسانها ان لديها مشاهد من الأرشيف (طبعاً البرنامج لم يكن رأى النور لا حين تصوير هذه المشاهد ولا حتى بعدها بعام!!) وع ذلك واجهت الطالب صهيب واتهمته بالكذب لأن المشاهد المعروضة كانت أمام مكتب وكيل الكلية في حين أن صهيب يؤكد لها ان العرض كان في المدينة الجامعية فلم ترحم حيرته واقتنصت الفرصة لتحقيق مكسب اعلامي زائل وبسييييط جداً بالنسبة الى ما سببته من أذى

وقد شاركت في مداخلة تليفونية مع البرنامج في حلقة لاحقة اذيعت يوم الاثنين الموافق 17/12/2006م

وقد وضعني "الكنترول" على الانتظار لحين انتهاء الفاصل الإعلاني لأُصدم وانا اسمع الحوار الدائر خلف الكواليس والذي تعلن فيه "منى الشاذلي" المذيعة "المحايدة" والتي اعلنت قبل اسابيع قليلة في قناة الجزيرة انها ليست من مذيعي "الفتة" كما وصفت زميليها (محمود سعد و معتز الدمرداش) . . كانت مُنى الشاذلي تقول أنها مستاءة جداً مما حدث وهذا حقها طبعاً؛ ومن منا لم يستاء!! ولكن ان تستطرد قائلة انها تتمنى لو هاجمتهم على الهواء ولكن "مش هاينفع" فهنا تكون الوقفة

الآن لنا الحق أن نشك في تلك الحملة الزائدة عن الحد

لنا الحق في ان نشك في الشريط الذي وصلها من الأرشيف . . هل هو ارشيف وزارة الداخلية مثلاً؟

لنا الحق أن نشك في مقولات مثل الإعلام المستقل والإعلام المحايد


انا شخصياً احسست ان ما حدث مجرد فيلم جيد جداً كان الورق والانتاج وفرق الكومبارس كلها جاهزة وفي انتظار "متطوع" لدور البطولة؛ وقد تطوع طلاب الأزهر بهذا الدور الذي قبلوه بحسن نية او سذاجة او عدم تقدير للعواقب . . وآمل من الله ألا يظهر متطوعون جدد فحياتنا لا تحتمل أفلاماً جديدة

هناك ١٦ تعليقًا:

عبدالمنعم محمود يقول...

يبقي الاستاذة مني الشاذلي بتشارك حملة اعلاميين الفته واعلاميين الحرائق وده المصطلح اللي هي أطلقته علي أحدلث تضخيم تصريحات وزير الثقافة المصري
وده بيصدق قول ان مفيش اعلام محايد أو نظيف في مصر
ام ما قام به الدكتور الطيب فمن الصعب التعليق عليه

غير معرف يقول...

مفاجأة من العيار الثقيل يا استاذ اسلام الكلام اللى انت قلته ده عن منى الشاذلى، يا سبحان الله واللى يعيش ياما يشوف

انا بس ليا رجاء بسيط من حضراتك، انك الله يكرمك ويحفظ عليك عينيك وعافيتك تغير الفونت اللى بتستخدمه ده لأنى عميت من الفونت الغريب ده

ولازالت الامتحانات مستمرة

غير معرف يقول...

بجد..
تسلم ايدك يا كواكبي.. الموضوع ده محتاج يشوف النور.
هاني؛

غير معرف يقول...

مضوع جميل يا إسلام
بس انت بالمنظر ده مش حيستضيفوك ولا حيسمخوا لك تتكلم تانى فى العاشره مساءً ولا يهمك
انا عرفت ان وضع الطلبه فى السجن سئ وانهم عازلينهم عن أى حد تانى ... لو عندك معلومه يبقى قولهالنا
أبوسيف

غير معرف يقول...

إزيك يا اسلام...
حملة وهتعدي...الاخوان ميقلقوش..
بس عندي تعليق على الاداء الاعلامي للإخوان خلال السنتين الي فاتو وهو إن بالرغم من إن الفرصة إتيحيت لظهور الاخوان إعلامياً إلا إنها لم تستغل
أو على اسؤ التقديرات استغلت خطئ
واستهلكت في غير محلها

وبيتهيألي إن سيطرة اخوان الاقاليم"الريفيين" على مجريات الامور في الجماعة هيكون ليه اثار سلبية على صورة الاخوان في الفترة الجاية ...لأن احتكاكهم المدني ضعيف شوية..
الكلام ده عن احتكاك شخصي

غير معرف يقول...

والله بجد الكلام عن الطيب ده بالظبط زى ما كنت عايزة اوصفه
انا بيتهايالى ساعتها انى هاقوم اكسر التليفزيون بسبب الكدب والبهتان العظيم اللى قاله على الطلبه ولاد الناس المحترمين
بقى اللى طالعين من الاوائل والباريين بوالديهم وبيحترموا الكبير قبل الصغير يعملوا كل اللى قال عليه ده كذب والله
قال ومنى الشاذلى تقوله ان زمان كان احترام المدرس وكان وكان قال هما فعلا قلوا ادبهم عليه
حسبنا الله ونعم الوكيل
بس سبحان الله لو حد خد باله ان الدكتور محمد السعيد دافع عنهم وقال ان فى شك انه ده فعلا حصل (قصده على كلام الطيب)بس فى الاخر اقول لعله خيرا

الكواكبي يقول...

السلام عليكم جميعاً:
بص يا عم جعلي . . انا كنت متمسك بالفونت اللي انا باكتب بيه رغم ان كتير قالوا لي انه سيء؛ ولكن حيث ان ده اول طلب تتطلبه مني فـ "هاتنزل المرة دي" وهاغير لك الفونت يا عم.

بالنسبة لك يا ابو سيف . . ما تقلقش من موضوع انهم مش هايطلعوني . . وطول ما أنت زمار وانا طبال هاتجمعنا الموالد على رأي واحد صاحبي

بالنسبة لموضوع الفلاحين او الريفيين . . ما كلنا فلاحين يا عم واللي نجوا من الموضوع ده بقوا صعايدة؛ المشكلة مش في الأصل منين؛ المشكلة في منهجية التفكير . . انا معاك جداً ان الحياة في هدوء الأقاليم بينتج عنه طريقة تفكير متناسبة معاه ولكن ما بتكونش مفيدة في التعامل مع احداث متلاحقة فما بالنا ببؤرة الحدث

الأخت الكريمة اللي علقت في الآخر . . انا مقدر صدق انفعالك بس افكرك ان د. الطيب في الاخر ارتضى ان يخلع عباءة العالم ليرتدي بذلة الموظف وبالتالي كان سلوكه سلوك (موظفيني) ان صح التعبير

يلا مش مهم يقول...

صاحبي ابو الاساليم لطفي
يجرد سيفه ويفتح خزينة اسرارهويطلق عيونه ليكشف لنا جزء من المؤامرة التي حيكت لفصيل سياسي وهو الاخوان
صدقني انا اتصدمت في اللي انت قلته عن مني الشاذلي ليه يا صاحبي علشان انا كنت بقسم الاعلاميين الي ثلاثة اصناف واحد بيمشي بالريموت كمنرول والتاني ملتبس عليه الامر والثالث اعلامي نضيف
بس باللي انت قلته عن مني الشاذلي انا لازم ادور علي تصنيف رابع مش عارف اسميه ايه بس مبدئيا هاسميه غشيم
لغاية لما حد يساعدني في ايجاد اسم ليه

غير معرف يقول...

جميل يا اسلام
بس انا عند رأيي...الموضوع هياخد يومين ويخفت..المهم في الموضوع هو ما بعد ..إيه إلي جاي

امبارح اتفرجت على فيلم wag the dog"
بصراحة فيلم رهيب
الاخوان محتاجين إدارة إعلامية محترمة تدير الناحية الاعلامية مستقبلاً بعد ما تعدي مشكلة الازهر دي على خير وميكنش ليها توابع..واظن ان هيكون ليها توابع اكبر من الحملات إي قبلها
وربنا يستر

عمرو طموح يقول...

كلام جميل...
بس مع احترامي ، أنا شايف ان ده تسرع في الحكم علي مني الشاذلي، مش دفاع عنها ي(للأنها مش من بقيت عيلتي) قد ما هو إني مبحبش أظلم حد.
المفروض، إن اللي بيعمل البرنامج بيبقي فريق متكامل، و اللي جاب اللقطة القديمة بدل اللقطة بتاعة المرة دي، غالبا مكنش مني الشاذلي، كان معد البرنامج... و عندي سؤال، هو معد البرنامج مبيحطش في البرنامج غير اللقطات اللي التقطتها كاميرات فريق البرنامج بس؟ أكيد لا، لازم ساعات كتير بيتزنق و بيجيب من "أرشيف" ، هو أنا معنديش فكرة، بس أكيد فيه أرشيف غير أرشيف كل برنامج علي حدة بيجيبوا منه الحاجات دي.

و كلمة حق برضه، هو مش برنامج العاشرة مساء من البرامج اللي ساعدت الي حد كبير في تسليط الضوء علي فعاليات طلاب الإخوان هذا العام؟ مش طلاب الإخوان مدينون له بالكثير من الزخم الذي صنعه البرنامج مناصرة لقضاياهم و مواقفهم؟

يعني حاول تفكر كده بحسن نية،بلاش نظرية المؤامرة ،و انت تبقي كويس:)

الكواكبي يقول...

وجهة نظر محترمة بس انت منفعل قوي كده ليه!! انا لم اهاجم البرنامج وانما انتقدت ما قالته وما لمسنها من حنقها على الموضوع وهو ما كان ظاهر لكل المتابعين
انا احترم كل ما قلته يا عمرو الطموح او الجموح مش هاتفرق كتير بس الاستظراف اللي في جملة "وانت تبقى كويس" غير مبرر وخلاني آخد عنك انطباع انك بتلعب

غير معرف يقول...

اسلام ممكن تبعتلي ايميلك للتواصل، انا صديق قديم و آخر مره شفتك فيها كان في كتب كتابك egyouth@yahoo.com

عمرو طموح يقول...

شوف يا أستاذ إسلام... هو إن حضرتك تاخد عني انطباع اني (بلعب) ده شيء ميسرنيش.
و علي فكرة هي كانت طالعة بتلقائية أثناء الكتابة، بس لو زعلت معاليك قوي كده، فمن حقك علي أن أقدم اعتذار... (و ده شيء مش سهل انتزاعه مني علي فكرة)
و علي فكرة أنا مكنتش منفعل و أنا بكتب التعليق، و حتي لو كنت كذلك،فهذا لا يعطي لأحد الحق في أن يحرف اسمي الذي اخترته لنفسي ليصبح في سياق التريقة عليا. بس يللا مش مهم، هعديها عشان خاطر المرة اللي قابلتك فيها، أفدتنا فيها بصراحة عن اللايحة و الكلام ده. و من علمني حرفا... أخلصت له ودا.

غير معرف يقول...

انت ايه مفيش حاجه جديده

غير معرف يقول...

السلام عليكم يا استاذ اسلام ..
أنا يا سيدى أحمد حلمى المحامى اللى انت مش عارفه .. انا قريت الموضوع على مدونة انا اخوان ومنه عرفت أجى عندك .. واحب أوضح لك القصة ..
الموضوع يا سيدى أن أنا كنت اخر محامى يغادر مبنى النيابة بسبب تحقيق فض الاحراز اللى كان اخر واحد ( أسأل عنه الاستاذ عبد المنعم ) وأنا برضو صاحب موقع مركز الحرية اللى نشر تقرير القضية .. بالتالى التفاصيل كلها عندى .. لما لاحظت تخاريف منى الشاذلى اتصلت بها وردت عليا هى ومحمد نصر المعد بتاعها وحاولت اوضح لهم خطاء المعلومات اللى بيقولها .. أدونى درس نص ساعة فى أن العيال دى ارهابيين وان الاخوان ارهابيين وسمعت منهم كلام لا يوصف إلا بأنه كلام قبيح .. ومع ذلك استحملت على أمل انى انجح فى الحصول على مداخلة لكن أنت دخلت وقطعت عليا وكانت النتيجة انهم ضحكوا علينا احنا الاتنين لا أنا عملت المداخلة اللى كنت عايزها ولا أنت خدت فرصة تقول كلمتين ..
الكلام اللى انت سمعته فى الكواليس انا سمعت اضعافه على التليفون واحب اقولك ان منى الشاذلى ومحمد نصر قالو لى انهم بيكرهوا الاخوان .. ودى سياسية واضحة عندهم جدا ..
عموما أعدك بأنى سوف أرد لهم هذا الموقف وأنا عارف حاردلهم الموقف ازاى .. لا تستعجل الايام قادمة ..
مع تحياتى يا استاذ اسلام ..
أحمد حلمى المحامى
http://freedomcenter.blogspot.com/

ادهم صبرى يقول...

احنا مش مفروض نلوم منى الشاذلى _معقول كل الهجوم دا على منى عشان الحلقه دى ونسينا كل حلقات منى اللى كشفت فضايح الحكومه والفساد اللى فى نسينا ان البرنامج بسبه فى قرارات بتصدر من مجلس الوزراء لما بشوف البرنامج والتقاير_ياجماعه متنسوش ان البرنامج دا بالذات على ضغت من الحكومه ومنى نفسها عليها بيترفع عليها قضايا وعلى البرنامج كمان مفروض احنا نعذرها ونقف معاها على الاقل _مفهاش حاجه لما مرة واحده بس تقول حاجه مع الحكومه بس عشان البرنامج يستمر _مش نهاجمها وننقضها مفروض يكون فى شويه عدل _نسينا كل حلقات البرنامج وكشفه للفضايح والفساد ومسكنا فى الحلقه دى بالذات _حرام ياجماعه والله حرام