08‏/03‏/2007

متضايق


من غير اي مقدمات علشان مخنوووق جداً . .

متضايق من حال البلد والعيشة واللي عايشينها


متضايق من الحكم على كريم عامر رغم اني كان ممكن لو قابلته اتف في وشه ؛ بس اكيد السلب والنهب وقتل المعارضين والإصلاحيين وتعذيبهم ومصادرة اموالهم اشد اساءة للدين واكثر اضراراً بالمصلحة العامة من مدونة كريم اللي ما حدش كان بيقراها غير عشرات من رواد المدونات معظمهم من باب الفضول والباقي اقتناعاً بما هو مكتوب فيها نتيجة الإصابة بتسلخات فكرية


متضايق من المحكمة اللي حكمت على كريم لأنها ادته سنة علشان اهان مبارك و3 سنين للأخبار الكاذبة وتكدير الأمن العام وكأن حسني مبارك بسلامته اهم من الرسول - مش باطالب بحبسه بس اذا كان ما اتعاقبش علشان سب الرسول يبقى على الأقل كان اتكرم علشان شتم حسني


متضايق من الأحزاب اللي لو قلت عليها كرتونية ابقى باظلم الكرتون لأن بعض انواعه اكثر صلابة من جميع رؤساء الأحزاب المصرية


متضايق من حالة البيات الشتوي اللي الاخوان فيها والدنيا حواليهم بتضرب تقلب


متضايق من عدم ابداء الاخوان لأي رد فعل تجاه كل ما يكال لهم ويحاك ضدهم من تهم ومؤامرات وكأنهم بايتين بره البلد وما حدش اداهم خبر ان النظام بيصعد ضدنا


متضايق من الندالة اللي استشرت بين الشعب


متضايق من الندل اللي لبسني في سور الدائري وجري من غير ما يعرف انا حي ولا ميت


متضايق من النجار المسلح اللي صمم مدخل محور 26 يوليو بعرض 8 متر . . وباخد نص ساعة علشان امر من منطقة لا تتعدى 1500 متر


متضايق من العلمانيين اللي بيتكلموا عن عودة محاكم التفتيش لو الاسلاميين وصلوا للحكم وهما بيفتشوا في ضمايرنا ونوايانا كل ثانية بكلامهم ده


متضايق اني حاسس بالعجز والقهر واني تقريباً مش قادر اصلح اي حاجة من الحاجات دي


متضايق

هناك 5 تعليقات:

أبوســـيف يقول...

وأنا كمان متضايق .. بس مش متشائم .. وبرضه مش متفائل
الظاهر إنى متلخبط .. وللا داخل على مرحلة إنفصام فى الشخصية .. ربنا يسترها علينا وعليك يا إسلام

محمود سعيد يقول...

من زمان مقريناش ليك حاجة

ومين سمعنا كلنا متضايقين من كل اللى انت قلته

ومن سكوت الإخوان
أتمنى أن يكون الصمت الذى يسبق أى حاجة حلوة
مش العاصفة

موسى موسى يقول...

تعليق قلته قبل كده في مدونة صديقة
بالنسبة لموقف الاخوان فانا شايف انهم اخيرا وصلوا للموقف الصح
سيب الحكومة تجيب اخرها و تعمل اقصى حاجة ممكن تعملها..و بردو يلاقونا شغالين في دعوتنا زي ما احنا لا هيعرفوا يقضوا علينا ولا هنبطل دعوة ولا حتى هنخش في فترة بيات زي ما كان بيحصل زمان ايام الضربات الامنية الجامدة...طريقنا معروف كل ما نمشي فيه اسرع كل ما النصر يقرب انما موضوع الرد ده بياخد وقت و جهد كبير احنا محتاجينلوه
و قبل كل ده..الحمد لله على سلامتك من سور الدائري

عبدالله يقول...

فعلا سكوت الاخوان بقي محير جدا
ياتري هما خلاص انتهوا مش قادرين يردوا فعلا و لا السكات ده قرارات منطقيه

محدش عارف
والف حمدلله علي السلامه من الي لبسك في السور مش تقلق السور كان عاوز يسلم عليك بس

تحياتي

entrümpelung wien يقول...

شكرا على الموضوع
entrümpelung
entrümpelung
entrümpelung wien