١٤‏/٠٣‏/٢٠٠٧

قصاص . . الصدر الحنين


قصاص . . الصدر الحنين
لأول مرة احاول اكون جملة واحس بالعجز والاقي الحروف بتهرب من بين صوابعي!! يمكن حروف الكلام هي كمان رافضة تستوعب ان قصاص حبسوه تاني ؛ وان القصاص الشخصية المتفائلة دوما والحالمة بيوم تكون فيه مصر حرة مرمي جوه السجن

من زماااان ما حسيتش بشعور اني غريب عن نفسي ومن زماااان لم احس بالرغبة في البكاء زي ما انا حاسس بيها دلوقتي

المشكلة اني مش قادر احدد سبب الشعور ده ليه؟ اصل اللي كان يشوف علاقتنا بمحمد سواء كنت انا ولا عبدالمنعم ولا اي حد من الشلة الموقرة مش هايصدق كم الحزن والكآبة اللي بقوا مسيطرين علينا

ابقى كداب لو قلت اننا كنا كنا مستنسخين من بعض او بينا توائم عقلي . . بالعكس

كل يوم كنا بنتخانق مع قصاص . . بس برضه كنا كل يوم بنتصالح ؛ بس مش علشان احنا ملايكة ولكن لأن القصاص قلبه كبير

يمكن كنا دايماً نختلف معاه في بعض الأمور؛ زي حركته او أدائه؛

نختلف معاه في اهتمامه الزائد بدعوته وفكرته ومبادئه على حساب شغله ومستقبله؛
كنا دايماً نتخنق من دفاعه الدائم عن الإخوان وانه ما بيقبلش اي مساس لا من قريب ولا من بعيد لا بالجماعة ولا قيادتها ولا حتى افراد في الصف ودايماً كان يجد للجماعة العذر والمبرر

كنا بنختلف معاه في احتوائه لينا في كل مرة بنزعل معاه بغض النظر عن مين فينا اللي غلطان رغم ان في كتير من المرات بيكون ليه الحق في انه يزعل؛

اختلفنا معاه في مسايرته وخفضه جناحه لكل الناس

كنا بنحس انه بيدادينا زي ام اي واحد فينا . . طب والله قصاص كان بيهتم بي عن امي مش علشان امي مقصرة لا سمح الله بس ما حدش بيتابع واحد عنده تلاتين سنة في شغله وصحته ومزاجه واصحابه ودعوته وفي جده وهزله زي ما قصاص كان بيعمل

يمكن زعلان عليه علشان كنت لما باشيل هم حاجة اروح ارمي عليه

او لما كنت اتزنق في تصليح العربية مثلاً وهو عارف اني باتخنق من وقفة الميكانيكي بياخدها هو يعملها

يمكن علشان لما كنت باتزنق في توصيلة لأهلي كان هو اللي بينجدني

او ممكن علشان كنت لما ابقى مسافر ومراتي تحتاج حاجة ما كنتش بالاقي حد مؤتمن غيره اخليها تلجأ له لحد ما ارجع
اللهم العن مبارك وحبيب العادلي وظباط امن الدولة : عاطف الحسيني واحمد مجدي واسامة الجبالي وحسن عبدالحميد وحسام عبدالحليم
وخلص مصر منهم ومن نجاستهم وظلمهم وبطشهم يا قوي يا مكين


ربنا يرجعك لينا يا قصاص

هناك ٥ تعليقات:

عبدو بن خلدون يقول...

سعادتي امبارح فتح "يللا مش مهم" قبل الفجر بشويتين... وبعد ما الصلاة خلصت فتحتها تاني لقيت الموضوع ده... ما اتشرفتش قبل كده بقصاقيصو ولا عمري شفته، بس سمعت عنه حاجات مش كتير، بس تقيلة طحن...
المهم كنت هأرد امبارح، بس لقيت جوايا كلام كتير، وكلام كبير عايز أقوله فضلت أكتب، وأطرقع علي الكيبورد، واشخبط في الورق لغاية لما طلعت:
ساعات معدودة
والله ما كنتش فاكر إني ممكن أكتب كل ده في زمن كياسي زي ده بس اللي حصل بأه.
عموما تابعونا: في مدونة "نجوم الحيرة"، عند أنشيمي عمرو بن طموح:



http://nojoomol7era.blogspot.com/2007/03/16.html

غير معرف يقول...

عارفين يا جماعة انا ببصم بالعشرة ان كل الكلام اللى اسلام بيقوله ده صح مية فى المية

قبل ما تقولوا مين اللى داخل يتح مع اسلام ده مين ...انا واحدمن الشلة الموقرة اللى اسلام اشار اليها فى معرض حديثة و بقول بجد كان البؤرة اللى بيلتف حولها الجميع لدرجة اننا كلنا بليل اللى عايزين يفكم عن نفسهم شوية كل اللى يعملوه انهم يكلموا قصاص و هو بيكلم بيقيت الناس و نتلم و نسهر ...و لما والدى رحمة الله تعب ...كان بيتابع حالته معايا لمدة سنة كاملة بكل تفاصيلها لدرجة انه لما بياخد حقنة بيسألنى على نوعها ...و فى جنازته من ثلاث اسابيع كان هو اول المشيعين على بعد 220 كيلوا واقف على القبر جنبى و اخر واحد ماشى من المقبرة...
ربنا يفك اسرك يا قصاص
ربنا يفك اسرك يا قصاص
ربنا يفك اسرك يا قصاص

Mohamed Almohandes يقول...

رغم أن معرفتى بالقصاص كانت سطحية، ورغم أنى لم أعايشه كما عايشتموه؛ ولكنى أحببته كما أحببتوه، وتمنيت أن أن تزداد معرفتى به بعد أن يفك الله أسره..
ورغم سوءات الاعتقال والحبس والظلم؛ إلا أن الاعتقال كان فرصة لإظهار النواحى الإنسانية التى لا يعرفها الناس عن هؤلاء الأبطال، والتى لا نذكرها دائماً فى الظروف العادية خوفاً من الرياء، وضياع الأعمال.
فك الله أسر القصاص، وأسر كل من معه..
وانتقم الله من كل ظالم متجبر..

غير معرف يقول...

لم اعاشر القصاص كثيرا قابلته مرتين او ثلاثة مش متذكر بظبط بس اقدر اقول ان كل كلام مجديو اسلام و محمود صح100% وربنا يفك اسره و اسر كل المعتقلين

وليد يقول...

اللهم فك أسره ..اللهم اشف والده وهون عليه .. اللهم صبر أمه وأخته وصبرنا على فراقه ..ز اللهم أعده لنا سريعا عاجلا غير آجل
وليد