13‏/04‏/2007

الفقري


الفــــقــــــــري
امبارح رديت على تليفون يحمل نبأ القبض على الدكتور محمد عبد العال استاذ مساعد الجراحة بطب عين شمس؛ كان معايا (منعمتي) المشهور بعبد المنعم محمود, المهم منعمتى بما عُهد عنه من نظرة سوداوية متشائمة لقيته بيسألني هما ممكن يمسكونا؟ وانا بكل تلقائية صححت له . . يمسكوك باعتبار اني مش وش قفش لأنه يبتلى المرء على قدر دينه ده أولاً؛ ولأني مش بافضل الحبسة اللي في الصيف علشان الجو بيبقى حر ومش طالبة عرق وتلزيق ده ثانياً

منعمتي اتنرفز جداً من فكرة انه هايتقفش تاني وكان بيقول ان ده مش هايحصل باعتبار انه لسه طالع من حبسة 6 شهور ووعدني انه هايبلغ عني لو ده حصل المهم اخدنا بعضنا ورحنا نتعشى مع بعض الأصدقاء اللي كلهم كانوا متوقعين يتمسكوا في الليلة اللي ما يعلم بيها اللي ربنا دي

المهم جالنا الاتصال الحزين من والدة منعمتي ان قوات امن الدولة قامت بحملة واقتحموا البيت بتجريدة وفتشوه

المهم ان منعمتي رغم ما عرف عنه من قدرة على التنبوء بالكوارث واستجلابها وانه فقري حقيقي مش تقليد الا ان حظه طلع كويس المرة دي وما كانش في اسكندرية في اليوم ده

يمكن دي أقدار ربنا علشان يشوف بعينيه حبنا ليه ومكانته في وسط كتير جداً من شباب مصر اللي زي الورد

مبروك احتفاظك بحريتك يا منعمتي ومبروك عليك حب اصحابك واخوانك

ورجاء من اخ وصديق قرب يقطع علاقته بيك

بطل نبر وتفقير ابوس ايدك

الشلة خست النص من نبرك

واحد اتقفش واتنين استدعاءات وفي الآخر يتفقر على نفسك

يا فقري

هناك 6 تعليقات:

امام الجيل يقول...

طب الحمد لله ان سترها عليه
اللهم اتم عليه سترك وحفظك
ويسر له امره0

القصاص للجميع يقول...

السلام عليكم

ما شاء الله عندك قدرة غريبة انك تقلب الموضوع تهريج...يعنى كل الناس داخلة تقول ربنا يحفظه و يهون على اهله و رسالة لإنقاذ والده و حضرتك داخل تقله يا فقرى!!!

انا متأكدة طبعا ان حضرتك بتدعيله و خايف عليه اكتر من اى حد فينا..و مش قصدى حاجة وحشة و الله بس كانت مجرد ملاحظة

ربنا يكرمك و يديم عليك هذه الروح العالية و يديم اخوتكم فى الله و يلم شمل الثقب قريبا إن شاء الله

و فعلا شر البلية ما يضحك

محمود سعيد يقول...

:-)

ربنا ما يجعله فقرى
ويبوظ نطريتك

بس ده حاجة شغالة عادى مع أى حاجة
مش محتاجة فقرى :-)

..... أنــــا يقول...

معلش هقلبها جد شوية يا اسلام لما سمعت خبر منعم مر علي نفس الخاطر اللي مر عليا يوم ما حافظ اتاخد ويوم ما القصاص اتاخد ويوم ما كلمني عبد العال من عربية الترحيلة إن فيه ناس لم تتأثر حركتها بالجو الكئيب المحيط ناس استطاعت أن تقهر قلقها وخوفها وتستمر دون تغيير في وقع أدائهم بل تستطيع القول إنه كلما ازدادت وتيرة القلق والملاحقات الأمنية كلما زاد عطائهم كل في مكانه ... اخونا دول صادقين في عطائهم ... الاصلاح فعلا قضيتهم قد نتفق أو نختلف على دور كل واحد أو طريقة أداءه لعمله لكن سنتفق جميعا أن هؤلاء يعطوا كل ما يملكون من جهد وهذا هو معنى الجهاد استفراغ ما في الطاقة من وسع في سبيل الله دون تردد ودون قلق
ودون فزع أو هوس أمني كما نرى من كثيرين
اللهم اجعلهم ممن قلت فيهم
أم حسبتم أن تدخلوا الجنة ولما يعلم الله الذين جاهدوا منكم ويعلم الصابرين
أسأل الله أن يكتبكم من المجاهدين الصابرين المحتسبين
وشكرا ليك يا اسلام على البوست الجميل ده
وليد السيد

غير معرف يقول...

فعلاًعلى رأيك انه فقرى فعلاً أحب أضيف حاجة لما كان فى الأسكندرية الأسبوع الماضى قعد يقول أنا لى وروحة عايزها مليش دعوة عشان السجن بيبقى حر ..........حبقى أجبهالك يافقرى
اسلام عبد الحميد

entrümpelung wien يقول...

شكرا على الموضوع
entrümpelung
entrümpelung
entrümpelung wien