17‏/04‏/2007

مندهش ووحيد


مندهـش ووحـيد
هذه الأيام تتجاذبني حالتين من الاندهاش والشعور الفظيع بالوحدة

شعوري بالإندهاش
مصدره الأساسي هو ما حدث لأخي في الله وصديقي ورفيقي في الدعوة والحياة (منعمتي) بعد القاء القبض عليه وانا بالقرب منه ولا أملك له من الأمر شيئاً . . تلقيت اتصالاً من منعم انه قد عزم امره ويريد ان يراني ولازمته في آخر سويعات له على ارض بلد بات ابنائها يستشعرون المان في البعد عنها

كنا قلقين من تبعات خروج منعمتي من البلاد بتلك الطريقة ولكن الأنباء التي وصلت عن حبس المتهمين في تلك القضية الى سجن المحكوم اسقط عنا اي تردد وجعلني من اشد مؤيدي عبدالمنعم فيما انتواه - سجن المحكوم لمن لا يعلم من اقذر واحط السجون المصرية وان يتم حبسك عاماً في حظيرة للبائهم لا تغادرها لهو أكرم لأدميتك وكرامتك من ان تقضي في هذا السجن اللعين اسبوعاً واحداً

اتصالين
اتصالين بين كل منهما 10 دقائق فقط هما كل ما تلقيته من منعم بعد ان دخل لوزن حقائبه

الأول: كان مليئاً بالفرحة والسعادة إسلام . . انا عديت واسمي مش من الممنوعين من السفر على الكومبيوتر

الثاني: اتصال مليء بالأسى والحزن به كلمتان فقط إسلام . . أنا باتمَسَك بلكنةٍ إسكندرانية افتقدها الآن

في اليوم التالي عرفت ان منعمتي يعرض على نيابة شبرا الخيمة ويا ريت ما حدش يسألني ليه شبرا الخيمة ومش امبابة او ابوتيج او الوادي الجديد لأنها مش هاتفرق والنتيجة واحدة ومعلنة مسبقاً . . ان منعمتي هايتحبس

في النيابة كانت الدنيا تسير على نحو مذهل

رجال النيابة في غاية التعاون والتعاطف مع عبدالمنعم وفي غاية القرف والغضب مما يحدث

رجال مباحث امن الدولة ما زالوا يبرهنون كل دقيقة انهم هم الأغبى في مصر؛ فمحضر التحريات مهلهل ورديء الى حد مثير للغثيان وحقيقة أنا لا أعرف لماذا انحدر مستوى الطغاة الى هذا الدرك . . اين التقارير المدبجة بعناية ومهارة؟! يبدو ان الداخلية لم تعد تحسن اختيار جلاديها ومعاونيهم وانها تستعين بمجموعات من الهواة في قمع الشعب وإذا كنتم تستغربون ما اقول اقرؤا معي ما تضمنه محضر التحريات من دلائل على اجرام منعمتي وقارنوه بالتهمة

الأدلة
  1. المتهم صحفي وقد دأب على نشر اخبار التعذيب الذي يقع في السجون والمعتقلات والأقسام المصرية ؛ يعني المشكلة انه نشر مش انهم بيعذبوا
  2. كما دأب على الاتصال بوكالات الأنباء الأجنبية وبعض الجرائد والصحف لنشر ما لديه . . مش فاهم المفروض الصحفي ينشر فين؟ في البلكونة مثلاً
  3. وقد قام المتهم بالإشتراك في مؤتمر منظمة العفو الدولية الذي عُقد في نقابة الصحفيين . . بالمناسبة وفد منظمة العفو زار مفيد شهاب واحمد ابوالغيط وحقيقي انا مستغرب ليه ما اتقبضش عليهم واشمعنى منعمتي؟ يمكن علشان اسكندراني على قد حاله من السيوف شماعة؟! . . جايز والله

الإتـهام

بناءً على ما تقدم انت متهم بتحريض 20 طالباً من طلبة معهد تعاون زراعي بالقيام بعمل اعتصام تخللته عروض شبه عسكرية بالإشتراك مع محمد عبدالعال استاذ جامعي من كلية طب عين شمس ويقطن مصر الجديدة ؛والمهندس نادر توفيق ويعمل في المقاولات ويقطن في أحمد عرابي بالمهندسين والدكتور سالم ويعمل صيدلي لديه صيدلية في شبرا

طبعاً انا مش هاعلق وهاسيب لكم التعليق بس بدون خروج على الضوابط الدينية والأخلاقية واتطمنوا فيه ناس كتير قامت بالخروج ده نيابة عنكم

شعوري بالوحدة

ده شيء خاص بي شوية بس حابب اني اشارك الناس معايا . . . حاسس اني مقطوع من شجرة . . معظم اصدقائي ما بين مهاجر هرباً من بطش نظام مبارك او نزيل في سجون مبارك؛

انا مفتقد بشكل خاص جداً قصاص ومنعمتي وميشو مشالي

منه لله كل اللي بيعاون طاغية على ظلمه وبطشه

هناك 7 تعليقات:

Hamada Elmasry يقول...

منعم الضيف الدائم منذ سنوات على سجون مصر حيث أنه يقضي أكثر من نصف العام فيها والباقي ......
فعلا بجد وحشتني يا منعم
عارفين منعم ده بيمثل لي أنا شخصيًا
البنا: أيوة البنا لإنه الإنسان العصامي في الدعوة وصاحب الرسالة اللي بيشق طريقه من غير ما حد يعلمه أو يفتح له الطريق بيبني علاقات وتواصل مع الصحافة ووكالات الأنباء والكتاب والمنظمات المهتمة بالحريات من غير تكليف من الإخوان ومن واسطة ولا مؤاخذة
فعلا وبجدالله ينعم عليك بالصبر يا عم منعم وإن شاء الله ظالميك إلى زوال وإذا كنت يا باشا اعتقلت من الطيارة فالريس نزل من الطيارة ليستقبله أقل مسئول في الحكومة الفرنسية يعني من الآخر الفرنساويين أكله قلم على قفااااااااااااه
ولا تنس إنك دخلت السجن بكرامتك وهو دخل فرنسا من غير كرامة وإنتم الاثنين نزلتم من الطيارة

محمود سعيد يقول...

الإندهاش
مش حالة بامر بيها
نندهش ازاى من نظام الطبيعى بتاعه كده
ده احنا ممكن نندهش لما ميعملش كده

ثم نندهش ليه لما ده طريق أصحاب الدعوات اللى احنا عارفينه
أن يتركوا أن يقولوا آمنا

لكن ممكن نندهش إننا مش قادرين نعمل حاجة
مش قادرين نعمل ليه


إنما بقى الوحدة ديه شعور مشترك
مش للسبب بتاع حضرتك قد ما هو بالنسبة لى لأسباب خاصة

إحنا عاوزين معية ربنا

أنس الشامي يقول...

إحساس فعلاً صعب و مخيف

لكن إن شاء الله أزمة و تعدي

و منعم هيطلع و هيرجع أقوى من قبل كده

و كلنا هنعيش في أمل

لأن البلد دي مفيش غيرنا هيحررها من

الطغاة دول ...

تحيا مصر ...

صاحب الهوامش

غير معرف يقول...

أيمن عبدالله

بقالى فى دبى دلوقتى اقل من سنة بحاجة بسيطة وطبعاً حاسس بالغربة بس مش قادر اوصف أد ايه الإحساس ده تضاعف عشرات المرات وكأن جبال فوق صدرى بعد الخبر ده وقبله خبر القصاص بس اللى ممكن يصبرنا هو أن القصاص ومنعم وكل اللى زيهم فى ذمة الله ومش حيضيعهم أبدا

يارب اشفى صدورنا واذهب غيظ قلوبنا

غير معرف يقول...

ولا يهمك يا عم إسلام كلها كام يوم و تحصل كل اللي بتحبهم هيهيهيهيهاهاهاها

..... أنــــا يقول...

السلام عليكم إسلام
أحسب ان الشعور ده يمر به الكثيرين منا أنا لما سافر التوني شعرت بالوحدة شوية لكن وجود حافظ وعبد العال ووجود اسلام ومحمد السيد الناس دية لم تشعرني بوحشة في الحياة لكن الآن كل هؤلاء بين مهجر وحبس ... لدرجة مش عارف هو أنا فعلا هقدر اعيش ازاي من غير الناس دية بيحدث لي موااقف كتير وامسك التليفون واجيب رقم حافظ أو عبد العال واتصل واكنسل بعد ما افتكر همه فيه أن تحيا بدون إخوانك فلا حياة اللهم ردهم لنا عاجلا غير أجل
أما بالنسبة لمحاضر التحريات وردائتها بالله عليك هتفرق في ايه ان المحضر يتظبط ولا ميتظبطش النتيجة واحدة واللي بيعمل المحضر لو كتب فيه جزء من ألف ليلة وليلة واكلم عن الزيني بركات فيه وأن العسس اكتشفوا تواطئ شهبندر التجار مع عبد العال ومنعم بردوا هيدوهم 15 يوم ... من الاستخفاف وصلوا لدرجة عدم المبالاة
ربك ييسرها ويفرجها أحسن ضاقت أوي
ألا إن نصر الله قريثب
وليد السيد

entrümpelung wien يقول...

شكرا على الموضوع
entrümpelung
entrümpelung
entrümpelung wien