١٧‏/٠٤‏/٢٠٠٧

مصر ولاّدة والله

رغم اني مش نشط في موضوع التدوين الا ان فيه خاطرة جت لي وحبيت ادونها
البلد دي ولادة؛ اي نعم عيالها كتيييير منهم الكويس ومنهم البايظ بس اللي بيبوظ منهم وبيخرج على طوعها بتعاقبه بانها تجيب له اخوات كويسيين يحسسوه بمدى وضاعته وخسته
ولما افتكرت أخبار القبض على شباب زي الورد من عينة منعم وقصاص وانس وعبدالجواد وايمن عبد الغني ومشالي ومحمد سليمان و يحي ومئات والوف من خيرة شباب مصر حسيت ان فيه امل وان البلد دي ما دامت جابت ولاد زي دول يبقى ممكن تعملها وتحمل في عيل يبقى راجل من ضهر راجل يخلصها من كل الأخوة الأوساخ اللي ذلوها هي وعيالها اللي هما في الأساس اخواتهم
منعم وقصاص واللي اكبر منهم زي المهندس خيرت الشاطر والدكاترة عصام حشيش و محمود غزلان والمئات غيرهم المحتجزين في سجون النظام متنعمين واللي ساجنينهم مساكين ومظاليم
على الأقل الناس دي كل يوم لما بيبصوا من شباك الزنزانه بيشوفوا نور الصبح ويشموا نسمة هوا ويفرحوا بيها . . بس السجان لما بيبص ما بيشوفش غير عتمة الزنازين وهواها العطن الفاسد
هنيئاً لنا بنور الصبح وهواء الحرية القادم لنا رغم انف الجميع وليحتفظ جلادونا وسجانونا لأنفسهم بظلمة السجن وبرودته

هناك ٣ تعليقات:

محمود سعيد يقول...

أول مرة آخد بالى من الموضوع ده

أن المسجون بيشوف النور ويشم الهوا

بس السجان مبيشوفش غير الزنازين
ومبيشمش غيرها

يعنى ساكن قصر العروبة ده ميعرفش والله يشم هو زينا
بيخاف من الهوا
ومن النور

غير معرف يقول...

بالظبط كده يا محمود

عليك نور

ألف شكر ليك أستاذ إسلام عالتدوينة

الرائعة ...

صاحب الهوامش

عمر أفندى و أبووه يقول...

يا عم اسلام تشكر على الكلام الحلو ده
بس انتا يعنى باصص على نص الكوباية المليان قوى ...

دول ولاد كلب يا عم رمين الناس دى فى السجون و سايبين الحرامية بره ...

ماشى يا سيدى خليهم بره السجون و هما هيبصوا على النور برضه ...موش لازم يشوفوا النور من شباك ام الزنزانة

و بعدين هو انا مشوفكشى بقالى فترة ليه وحشتنى يا عم و الله

ممكن نضرب بطيخ عند توت اكسبريس لو عايز