23‏/05‏/2007

معلش لأني إخوان


معلش لأني اخوان

معلش أصل أنت اخوان كانت هي الجملة اللصيقة لطبلة أذني طوال محاولاتي اليائسة لزيارة عبدالمنعم محمود صاحب مدونة أنا إخوان

عندما ذهبت لتسجيل الزيارة أول من قابلته عسكري نحيف ذو بشرة قمحية من الإسكندرية؛ أخذ مني بطاقة تحقيق الشخصية دون أن ينظر إلى وجهي وقام بتسجيل الإسم وعند اعادته للبطاقة نظر الي ولم يعطني البطاقة حتى سألني انت اخوان يا بيه فتعجبت ورردت عليه اشمعنى وكان الرد الدبلوماسي حاضراً لديه سيماهم على وجوههم بس حضرتك لازم تروح تستأذن الظابط الأول؛ ولما سألته لماذا أنا بالذات الذي سيسأل الظابط قبل السماح له بالزيارة كان رد العسكري الاسكندراني معلش أصلك إخوان

ذهبت إلى ظابط مباحث قطاع ليمان طرة وهو شاب ممتليء تنبيء ملامحه أنه من صعيد مصر الجواني على وجهه امارات طيبة سابقة وان كانت طريقة حديثه تنبيء أنه قرر ان يهجر طيبته السابقة كي يستطيع العيش والترقي في سلالم مجد وزارة التعذيب والقهر المصرية - الداخلية سابقاً؛ طلب مني علاء ظابط المباحث أن أعرفه بنفسي ولما عرف بأن عملي له علاقة بالتدريب على حقوق الإنسان قام بمحاولة استعراض كل مهاراته القانونية القليلة ليقنعني بعدم مشروعية زيارتي وبأنه لا يقدر على استثنائي وعندما تعجبت من عدم استثنائي خاصة وأن كل من بالسجن تقريباً زياراتهم استثنائية رد علي قائلاً بس انت حالة مختلفة وبإبتسامة لزجة أردف قائلاً ما تنساش أنك إخوان يا دكتور

بعد محاولات جهيدة سمح لي بالدخول شريطة أن استأذن المأمور اولاً فإن وافق فلا مانع عنده من الزيارة . . مرت دقائق طويلة قبل أن يظهر المأمور مودعاً ترحيلة قضية اموال عامة؛ استرعى انتباهي ان المتهمون يهتفون الله اكبر أثناء ركوبهم لسيارة الترحيلات فسألته مندهشاً هو فيه ايه فضحك وقال لي الإخوان بهتوا عليهم ثم سألني عن طلبي فقلت له زيارة عبدالمنعم محمود فقال لي بترحاب قوي قوي ولم يكد يكمل جملته حتى فوجئت بالأرض قد انشقت عن شاب نحيل البنية ضئيل القامة كالذين يظهرون في اعلانات الجبنة النستو قبل ان يتحولوا لعمالقة بفعل الجبنة المثلثات

كان اسمه محمد ويرتدي ملابس مدنية وفوجئت به يتدخل معنا في الحديث موجهاً كلامه للمأمور قائلا مش هاينفع يا سعادة الباشا فلما استفسر منه المأمور عن سبب اعتراضه رد عليه قائلاً أصله إخوان والتعليمات بتاعة امن الدولة أن اللي يمشي على باقي السجن ما يمشيش على الإخوان . . طبعاً لست في حاجة لأن أذكر لكم أن المأمور قال لي في صوت خفيض ونظرة منكسة إلى الأرض تقريباً كده مش هاينفع طالما التعليمات ما تسمحش

ظلت الكلمات ترن في أذني أثناء خروجي من السجن وحتى هذه اللحظات

معلش اصلك اخوان . . أنت حالة مختلفة وما تنساش يا دكتور أنك أخوان . . اللي يمشي على باقي السجن ما يمشيش على الإخوان

ايوه أنا إخوان

أيوه أنا حالة مختلفة لأني إخوان لأني مش رايح ازور ناس سرقت ونهبت وقتلت وحرقت بالعكس دي ناس بنت وعمرت وعلمت وفكرت

أيوه موافق ان اللي بيمشي على باقي السجن ما يمشيش علي لأني محبوس ظلم في قضية رأي وحرية مش مخدرات او دعارة


أنا آسف أيها النظام الفاسد لن أخجل من كوني إخوان؛ عذراً ايها الضابط المتجرد من انسانيته وفطرته لن ألحق بك في طريق الهمجية وسأبقى إخوان

لا مؤاخذة ايها الكائن الضئيل يا من قمت بتعريف المأمور بالتعليمات الواجب اتباعها مع الإخوان

فلتذهبوا إلى الجحيم جميعاً

ومعلش لأني إخوان


هناك 12 تعليقًا:

عبد الجواد يقول...

ايوه معلش يا صاحبي انت اخوان
انت اخوان وتستاهل انك اخوان
انت اخوان .. بس الحمد لله انك اخوان
انت اخوان ... ويمكن لما بنشوف بتوع الجنيايات ولا الاموال العامة بنقول الحمد لله اننا اخوان
انت اخوان ... ومنعم اخوان ... وانا اخوان
والحمد لله اننا اخوان
وغصبا عنهم هانفضل اخوان
وكمان بالعند فيهم هاناثر علي كل الناس
لغاية لما يبقى كله اخوان .. الا هم
لاننا ميشرفناش انهم يكونوا اخوان
ولا اقولك ربنا يهديهم وهما كمان يكونو اخوان

سامح البرقي يقول...

طول عمرك هاتفضل متشدد ومتسرع
زي ما عمو قصاص كان بيقول
ماحاولتش تتنكر وتقول ان انت قريبه من الصعيد؟
علما بان منعم اسكندراني؟
الله يخرب بيتك يا حسني انت ومن بري لك قلما او مد لك يدا او عاونك باي شكل من الاشكال

محمود سعيد يقول...

ما هو حضرتك اللى غلطان

بقى تكون إخوان وليك هذا الشرف وهما لأ


مش عارف كده كان فى أغنية بتاعة مش عارف باين شيرين ولا مين
المهم أنها واحدة وخلاص

كانت بتقول
والله ما أنا فاكر
تقريبا زى ما تكون عاوزة تقول متكونش ملاك فى دنيا شياطين
(نسيت كانت بتقول إيه)

أنا باكره الكلام ده جداً
وباكره الأشخاص ديه جداً
وزى اللى قال لا تكون متفوقاً فى عالم منحط

إنما الإنيل أنه يعاملك على أنه شيطان علشان أنت ملاك
(طبعاً ده كلام مجازى بس)

والحمد لله
نشرف أننا من إخوان

أحمد عبد الفتاح يقول...

بصراحه محمود معاه حق
انت الي غلطان
كنت تتصل بيا كنت هديك طقم منحرف من الي هو وصدقني لو عمل قر مكنش هيعرف انك اخوان
انا عندي كام طقم من دول لزم المشاوير الي ي ده

..... أنــــا يقول...

الله يسمحك يا إسلام يعني شوف أنا أعرف من إمتى وعمرك ما قلت ليه انك إخوان .... ثانيا اسمها جنة نستون

نكلم جد بقه .... في سنة 95 كان فيه مسجون يهودي معانا اسمه ياريف كان مسجون 3 سنين في قضية تهريب مخدرات كامن المأمور بيسيب ليه حجرته ساعتين في اليوم لما صحبة ياريف تيجي عشان تقضي معاه بعض الوقت وفي يوم خرجت زيارة لعبد المنعم عبد المقصود عشان استلم الطبلية لقيت المأمور قاعد عرى كرسي خرزان برة حجرته وياريف في حجرة المأمور مع زميلته .... الطريف إنه أول ما شاف عبد المنعم معاه الزيارة جه جري وبعد ما عبد المنعم عبد المقصود مشي قعد يفتش في الزيارة وخد الورق والاقلام وماكينات الحلاقة اللي كانت مرسلة وخدهم عنده ولما طالبته أن يتركم علشان الطلاب اللي بيذكروا رفض ولما دخلت حكيت لأحد الجنائيين وكان اسمه حلمي وقالي قول لياريف يجبهالك
هيه دية مصر يا عبلة
تدوينة حلوة يا سلم
وليد

الكواكبي يقول...

صاحبي السيد/ أحمد عبد الجواد أنا عارف انك طيب بس مش لدرجة انك تدعي انهم يبقوا اخوان . . الجماعة مش ناقصة رمرمة
عناكب النت محمود سعيد واحمد عبدالفتاح مين قالكم اني ما كنتش لابس منحرف؟ انا كنت لابس تي شيرت مخطط بالعرض زي بتاع دنجل وعصابة القناع الأسود بس ما نفعش برضه
وليد باشا السيد انا حاولت اخبي عليك السر ده كتير بس القدر كان اقوى مني . . الموضوع بدأ في ليلة ضلمة وممطرة وكان ماشي بارتجف . . . و بدل ما اطول عليك ممكن تتفرج على فيلم الخطايا اسهل :)

اسماء العـــــــريان يقول...

معلش لانك اخوان ... اتقالتى كتير مع بعض الناس بس عشان انا بنت عصام العريان

نفتخر وسنظل نفتخر اننا اخوان

ولن نتنازل ابدا

بس كان المفروض ان حضرتك كنت تتصرف بشكل تانى .. الناس دول يجوز معاهم ا حاجه

حسبنا الله

عبد الجواد يقول...

بلاش يا صاحبي يكونوا اخوان
بس علي الاقل ربنا يهديهم
مش بعيد يا صاحبي
وعلي العموم متزعلش
ربنا يهديهم ان لم يهديهم
كده كويس

الفجرية يقول...

طب هوه حد يرغب فى السماح له بدخول سجن المحكوم يخبرهم ان عمله له علاقة بالتدريب فى مجال حقوق الانسان

اذا كان سجن المحكوم نفسه ووجوده على ظهر البسيطة فى حد ذاته كده وبعيدا عن ما يحدث داخله حتى ضد ابسط بنود حقوق الانسان

اخاف ان الموضوع يتطور مع الوقت ولا يقتصر حتى على الاخوان ولكن يمتد ليشمل كونك بشر

وتبقى معلش انك انسان
وتبقى الفرصة الوحيدة للحياة بكرامة فى مصر لاشباه البشر وفى منهم كتيييير

abouomar يقول...

و الله وجهة نظر محترمة ان ازاى يا ذكى تبقى رايح سجن اقل ما يقال عنه حظيرة حيوانات و تقولهم انا حضرتك مسئول عن التدريب فى مجال حقوق الانسان...فذلوك قوى حضرتك من الفذلكة

النقطة المثيرة للإهتمام و ارجوك وضحهالى يا اسلام هو العسكرى الاخضر الاولانى خالص ...لما اخد منك البطاقة جالك قالك اصل انتا اخوان على اعتبار ايه انك داخل لواحد من الاخوان يعنى و لا بطاقتك فيها حاجة و لا انتا كنت شايل السيفين و المصحف فى جراب المسطرة حرف تى بتاعت هندسة دى ولا ايه...

almonshedal3am يقول...

آه يا أبو إسلام يا جامد!!
إخوان؟! معقولة دي؟
واحد محترم وشيك وأخوه متجوز من المعادي (واخد لي بالك) وطلعت معاه العمرة سنة 2000م وكنا بنطبخ سوا بعض الحاجات على المركب وفي الآخر أكتشف إنه إخوان؟!
إيه المفاجأة الغريبة دي؟
تصدق إني صحيت من النوم من 14 سنة لقيت نفسي إخوان برضه؟

واضح إنها غريبة الحكاية دي؟ بتحصل إزاي وإمتى وفين، متعرفش يا أخي...

أصلي برضه لما دخلت الجامعة فضلت إخوان وبعد التخرج إخوان، واتجوزت بنت أحد قيادات الإخوان ومن الأخوات واشتغلت وسافرت لبنان ورجعت وأنجبت وبرضه لسه إخوان؟!!!

يكونش وباء منتشر ولا حاجة لا سمح الله؟!!
يالله ربنا يشفي كل مريض ويكون من الإخوان ويثبتنا ويهدينا جميعاً...قول آمين.

المهم وحشتني جدا يا سلم ونفسي أشوفك واللهِ...

أخيراً انضميت لكتيبة المدونين...

أخوك/
المنشد العام للإخوان المسلمين
http://ellygowwaya.blogspot.com

entrümpelung wien يقول...

شكرا على الموضوع
entrümpelung
entrümpelung
entrümpelung wien