٠٤‏/٠٤‏/٢٠٠٧

هيصي يا مصر . . الشيوعيون قادمون


حكومة مصر الرشيدة النظيفة المباركة تعيش حالة من التخبط الفظيع وواضح ان فيه صراعات لا نهائية داخل اروقتها في الأغلب حوالين تقسيم تورتة البلد بينهم بعد ما بسلامته يسلم نمر ويقابل رب كريم

حاولوا تقروا معايا السيناريو ده كده ونحاول نركب الأمور على بعضها يمكن نعرف نفهم حاجة في البلد دي

حيتان رأس المال بتسيطر على الحكومة والحزب الوطني بالكامل بدء من رشيد مروراً بابني الخالة مغربي ومنصور وليس انتهاءً بعز وولي العهد جيمي الثاني

الحكومة اللي بيسيطر عليها رأس المال صادرت اموال وشركات رجال الأعمال من الإخوان رغم ان ده ضد مصلحتهم ولو قصاد الأسواق والاستثمارات الأجنبية على الأقل

محمود امين العالم بيعلن عن تنظيم سري على الصفحات الأولى في الجرائد

الحكومة عندها حوالي 300 معتقل من الإخوان بتهمة الانضمام للإخوان اللي هي في الآخر علنية بس محظورة

الحكومة اللي بتسحل اي حد يفتح بقه ويطالب بحقه ؛ ولما قطر الصعيد اتحرق صرفت للميت الف جنيه وللمحروقين ولا زالو على قيد الحياة ثلاثمائة جنيه خضعت لضغوط العمال واضرابتهم والملايين طلعت علشان تسكت غضبة العمال وتسكن جوعهم ولو مؤقتاً ولكن في نفس الوقت لم تلتفت الى عشرة آلاف اسرة تشردت بعد غلق شركات الإخوان

ورغم ان محمود امين العالم وسعت منه شوية وادعى ان اليسار هو اللي ورا الاضرابات دي الا ان الدنيا بيييس جداً والحكومة كووول؛ بس طلبة الزهر لما عملوا استعراض مكون من 40 طالب شافت ان ده اخلال بأمن المجتمع واعتقلت 180 طالب واستاذ ورجل أعمال

جريدة البديل لسان حال الإشتراكية الديموقراطية بعد ما الحكومة كانت لابسة في دماغها جزمة قديمة ورافضة اصدارها وافقت امس على الجريدة - نفس يوم الإعلان عن التنظيم الشيوعي السري العلني - وفي نفس الوقت بتحاكم ابراهيم عيسى ووائل الابراشي وحجبت موقع الإخوان الصادر بالإنجليزية وقفلت جريدة آفاق عربية والأسرة العربية ومن قبلهم قفلت جريدة الشعب

الخلاصة . . انا خايف ان عباقرة الحزب الوطني يكونوا اتهبلوا في دماغهم اكتر واكتر وقرروا يلعبوا لعبة السادات اللي لعبها زمان مع اليسار وقرروا انهم يلعبوها مع الاسلاميين ويفتحوا لليسار علشان يقلصوا نفوذ وانتشار الاسلاميين

طب مش لو حصل تبقى الحكومة دي زي العسل

والله هايبقى شو راااائع وهايبقى اجمد من اي فيلم للمبي او القرموطي

عموماً خلونا نتفرج ومن يضحك أخيراً يضحك كثيراً واحتمال بقه يوجعه كمان

هناك ١٠ تعليقات:

غير معرف يقول...

طيب وانت زعلان ليه يا اخي مش ده ممكن يبقي فصيل سياسي محترم في المشتقبل القريب او البعيد/ محدش عارف حاجة.
المهم انت وبقية اخواتك الأخوان والأخوات تحترموا وجوددهم وما تجوروش على حقهم في التواجد.
وكون الحكومة مزنقة عليكم وموسعة عليهم ده شغلها وشغلكم معاها.
وعلى العموم يا اخي لما يبقي فيه توازن في الساحة اللى مش باين لها ملامح دي هايبقي شيء كويس. هو يا إما يبقي اخوان ودنيا مقفلة زيادة عن انها متقفلة او وطني جاب ضلف البلد دي.
وعلى العموم يا ريت السيناريو اللى قلت عليه ده يتحقق اهو على الأقل نشوف ونغير مناظر وديالوجات وديالكتيكات.

الكواكبي يقول...

الأخ المجهول
اكيد انا مش زعلان من اليسار ولا باحرض عليهم زي ما حد قال لي في مكالمة تليفونية؛ بالعكس انا شايف ان حد يشتغل سياسة بجدية واحترام في مصر هايشكل اضافة جديدة لكل القوى الأخرى وهايدفع في اتجاه تجبه الجميع ضد النظام, كل ما في الأمر اني معترض ان البلد يبقى مسيطر عليها مجموعة مصابة بحالة من العته السياسي الغير مبرر قد يدفعهم لتكرار سيناريو نفس النظام لعب بيه واتلسع ان جاز التعبير بس مع اختلاف الأدوار يعني زي ما اتلسع من الاسلاميين تقريباً عايز يجرب كل انواع اللسعات
رحم الله السادات . . عاش من اجل السلام ومات من اجل السلام وذبح على الشريعة الإسلامية

محمود سعيد يقول...

والله أنا أظن أن الكلام ده كله هجص مركز

يعنى راحت لقيت شوية ورق كده وأصرت راح أقر واعترف

لأ وإيه حتى الورقة اللى نقلتها كأنه من ورق التنظيم ورقة عادية مفيهاش عمل ولا حاجة

تنظيم هو بيحلم بيه أشك فى وجوده على أرض الواقع (نوعاً ما) مع أنه فى شوية من وجوده صغيرين

ألا هى كانت رايحة تعمل إيه أساساً لما عملت الحوار ده


بس وإيه يعنى هو احنا بيهمنا
تلعب الحكومة اللعبة ديه واحنا يا يحطونا كلنا فى السجن يا يسيبونا للشعب

بس أظنها إلهاء لينا (زى السلفيين)

وزى هالة سرحان والسفاح

يلا مش مهم يقول...

الاستاذ الل يمعلق في الاول انا مش عارف جاب الفكرة اللي عنده دية منين
من الواضح انه كان بيقرا في تدوينة تانية لاني دورت علي اللي بيقولووه ما لقيتوش
تاني حاجة حلوة قوي حكاية ان اللي بيحصل ده جيم بين الاخوان والنظام وهما حرين مع بعض يعني حضرتك هاتبقي لا مؤاخذة الثور الاسود الي هايتم اكله بعد الثور الابيض
ثالثا هل الحل الوحيد اما اليسار علشان يظهر ان النظام يخنق الاخوان انا اعرف اليساريين واشتغلت معاهم وما ظنيش انهم بالضعف ده وبعدين لو انت واثق من نفسك انزل الميدان واشتغل مش تفرح لما واحد مفتري يظلم ويقمع فصيل نشط حتي ولو اختلفت معاه
ارجوا انك ما تكونش من اليسار لان اليسار دماغه اعلي من كدة بكتييييييييييييييير

عمر عاشق القرآن يقول...

انا شايف ان الحكومة عايز تبين ان فيه معارضة بس المعارضة اللى الحكومة عايزياها لازم تكون كومبارس مش اكتر

لكن لو اليساريين كبروا وبقت ليهم قوة عشر الاخوان الحكومة هتحولهم محاكمات عسكرية برضه

غير معرف يقول...

الاستاذ كاتب الموضوع ماظنش انه اطلع على التكذيب المنشور فى جريدة الاهالى على لسان محمود امين العالم يوم الاربعاء الماضى
و زى ما كل الناس عارفة ان موضوع المصرى اليوم هو عبارة عن بلاغ امنى او تصعيد للرأى العام حتى يتاح للنظام الجاثم ممارسة هوايته فى الاعتقال و التعذيب لليساريين فى مصر
بس كل ده مش مهم و مش سبب تعليقى على موضوعك
انا حبيت اعلق بس على موضوع عمال الشركات اللى الحكومة انصاعت لطلباتهم فى الوقت الذى لم يتحرك احد حين تم اغلاق شركات قادة الاخوان
يا صديقى الحكومة استجابت مجبرة على طلبات العمال لأنهم ناضلوا و اعتصموا و اضربوا عن العمل و عن الطعام و وقفوا بكامل قواتهم ضد الامن الذى حاصر الشركات وقتها
فى الوقت نفسه الذى لم يتحرك عامل اخوانجى واحد فى اى من الشركات المضارة
و ذلك لأن ثقافة الاضراب العمالى و الدفاع عن مصالح العمال هى من المصطلحات التى لا تتواجد فى الخطاب الاخوانجى
حتى بيانات الجماعة و احاديث سادتها فى القنوات التليفزيونية تخلو تماما عن اى حديث عما حدث و سيحدث لألاف العمال المشردين من جراء غلق الشركات و التركيز فقط على ذكاء خيرت الشاطر التجارى و الاقتصادى و انه يمثل نابغة تجارية و الحديث عن الرموز الاخرى المعتقلة - على فكرة انا ضد اعتقال الاخوان او اى شخص نتيجة فكره -
و ايضا يا اخى هل افهم من تدوينتك انك تريد من الحكومة ان تقوم بحملة اعتقالات خلال اربع و عشرين ساعة من نشر المقال حتى لا تتهم اليسار بالتواطوء مع الحكومة ؟؟
منطق غريب
نفس ما حدث حدث مع طلاب الازهر من الاخوان
انتظرت الحكومة العسكرية فترة حتى ازداد الموقف اشتعالا و غضبا ضد الاخوان و قامت بضربتها
اظن ايضا المصرى اليوم كانت هى صاحبة المبادرة بالابلاغ عنهم

اه
على فكرة كمان
الحكومة عرضت العرض اللى بتتكلم عنه فى اخر تدوينتك على فصائل يسارية و احزاب علنية ايضا
فاكر انت لما طلع القيادات من الاخوان و معسكرات ابو بكر الصديق و تحالفات و غيره معهم حتى يقوموا بضرب اليسار فى مصر ؟
بس يظهر ان اليساريين فى مصر - و تصور يا اخى - عندهم مبدأ جميل قوى
بيعبر عنه مثل محدش بقى بيستخدمه الايام دى
بيقولك : انا و ابن عمى على الغريب

الكواكبي يقول...

الأستاذ ابراهيم علي
بعد تحيتك التحية الواجبة باحيي نضال عمال مصر الشرفاء اللي اتحركوا علشان ياخدوا حقهم
وباقولها بصوت عالي يا رييييت كان الاخوان اتحركوا زي العمال
انا بس مش فاهم منين اني باخون اليسار او باحرض عليه او اني حتى مبسوط من تحالف السادات - الاسلاميين في الماضي
بالعكس تماماً انا بانتقد النظام الغبي اللي عمره ما بيتعلم من اي شيء سواء كان صح او غلط نظام زي الفئران ليس له تاريخ . . الفئران فقط هي التي ترى نفسها تسقط في المصيدة ولا تتعلم من هذا الخطأ جرياً وراء قطعة جبن مسممة وقد لا تهنأ حتى بطعمها المسموم
ارجو تكون فهمت قصدي يا ابوخليل

لن أستكين يقول...

القول الحصر في تلخيص تكية مصر
http://wakeupandgo.blogspot.com/

غير معرف يقول...

على العموم يا إسلام كويس إنك عارف إن السادات لعب اللعبة دي ضد اليساريين و استخدم فيها الإخوان و غيرهم من الجماعات الإسلامية و اعترافك بده يخليني عندي أمل إن الجيل الحالي من الإخوان ممكن يعترف بأخطاء الأجيال السابقة فما يقعوش في نفس الأخطاء دي تاني، أو على الأقل دة المفروض، و أحب أطمنك إن اليساريين تاريخهم يشهد لهم بأنهم عمرهم ما دخلوا صفقات مع الحكومات ضد أي تيارات سياسية حتى و لو ناصبوا هذه التيارات العداء، و أن اليسار حتى و لو كان تأثيره ضعيف حالياً فهو سيظل رأس الحربة في النضال الديمقراطي و أظن إنك عارف كويس إن حتى اليساريين الذين يرفضون التنسيق في أعمال سياسية مع الإخوان هم أول من يتظاهرون من أجل الإفراج عنهم، و أرجوا أن أقابلك في المظاهرة القادمة دفاعاً عن حق المصريين جميعاً في الحرية

غير معرف يقول...

إسلام يا ريت ما تنساش إن في الوقت اللي وافقت فيه الحكومة على جريدة البديل لأن المحكمة كانت مأجلة القضية كآخر أجل لرد الحكومة على ما جاء بعريضة الدعوى ، و انت محامي و عارف إن دة معناه إن القضية كان هايحكم فيها الجلسة اللي بعدها لصالح الجريدة نفس الحكومة بتقفل فروع دار الخدمات النقابية و العمالية في المحافظات و بتشمعها بحجة إنهم شيوعيون و هما اللي ورا الإضرابات العمالية الأخيرة و ياريت برضه أشوفك بكرة الساعة 1 ظهراً في الوقفة الاحتجاجية للتضامن مع دار الخدمات أمام وزارة التضامن الاجتماعي بشارع القصر العيني زي ما بتلاقي كل الشيوعيين في المظاهرات بيطالبوا بالإفراج عن كل المعتقلين المصريين و على العموم لو ما جتش برضه هاتلاقينا كلنا في المظاهرات الجاية بندافع عن حقكم و حق كل المصريين في التنظيم